Воўк крыві, як мы віна, нап’ецца, Верабей склюе сваю мякіну... На каго ты нас, паэт, пакінуў? Аніхто нідзе не адгукнецца. Пройдзе дождж, і на кладах трава, Як малітва, прарасьце зь нябыту. Воблака, як Сысава царква, Праплыве па вечнасьці блакіту Зь веку ў век, дзе нам ці быць з табою, Бы стаяць прад белаю царквою, І за ўсе, усе грахі свае Быць нямымі, як крыжы, каменьне, Толькі чуць, як салавей пяе, Толькі бачыць, як танцуюць цені На кладах, дзе, як агонь, паэт Анікому з нас не адгукнецца Ды ўздыхне травою нам усьлед І дажджу за нас, як мы віна, нап’ецца...
|
|